دنيا الاحلام !!!

بحلم بحاجات كتير نفسي تتحقق بس مش لازم كلها ممكن نصها او ربعها او حتى واحدة منها ، وف يوم من الايام من كتر الاحلام نمت وبرضه حلمت اصل الاحلام ورايا ورايا ، حلمت كأنى ف جنة مشفتش فى حياتي قد جمالها والعصافير هنا وهناك بتغنى انشودة روعة والورود اشكا ل والوان اعذرونى اصل جمالها خطف قلبى ف لحظة فجأة لقيت صوت بينادى انا المستقبل خفت منه اصل انا متعودة علي كده انى اخاف من بكرة دايما لقيته بيمد ايداه ليا بيقولى تعالى متخافيش مفيش حاجة هنا تقلقك روحت معاه لدنيا تانية دنيا غير الدنيا ديه دنيا نضيفة خالص مفيهاش ولا حتى ذرة تراب صغيرة دنيا مفيهاش لا وسطة ولا حتى كوسة دنيا كبيرة الناس كلها عايشة مع بعضها محدش بيعض حد محدش بيبص لحاجة حد محدش بيحسد حد محدش بيكره حد ولا بيقتل حد دنيا بجد مش اى كلام دنيا تحب انك تعيش فيها فعلا مش دنيا تتمنى كل يوم فيها انك تموت مهو الاخرة اكيد هتبقى احسن من الدنيا ديه دنيا مفيهاش غدر ولا صاحب بيخون صاحبه ولا راجل بيقتل مراته عشان قال ايه خناقة هايفة دنيا فيها حب بجد مش ناس بألف وش دنيا فيها الضمير حى مش نايم من ألف عصر دنيا محدش قاعد فيها عاطل كل الناس بتشتغل الصغير قبل الكبير بس بضمير مش كله تقليب ف تقليب دنيا الشوارع فيها فاضية لدرجة ترمى الابرة تسمع صوتها مش زى الشوارع بتاعتنا اللى ممكن تتوه فيها من كتر زحمتها دنيا مفيهاش حكومة ذكية ولا حتى غبية اصل كلام بينى وبينك الحكومة اللى عندنا دى مستقوية وع الناس مفترية لا يهمها حد ولا بتسمع كلام حد دنيا التعليم فيها بحد مش مجرد حفظ وادخل الامتحان واطلع ابيض من الصينى دنيا الناس كلها بتحترم بعض مش زى عندنا العيل الصغير بيمسك للكبير مطوة وفجأة تلاقيها ف بطنه غارزة دنيا تحس فيها بالامان بجد مش كلام وبس دنيا تلاقى فعلا فيها الشرطة ف خدمة الشعب مش دنيا فيها الشعب والوطن ف خدمة الشرطة واللى مش عاجبوه يروح يبلغ ولا اقولك من غير ماتبلغ وتتعب نفسك هى عندها من التهم كتير بس اللى يشيل و..................كان نفسى اكمل الحلم بس للاسف صحيت ع الواقع المر اللى احنا عايشين فيه وللاسف مش قادرين نتحكم فيه ما احنا كده يابشر مفيش ف ايدنا غير الاحلام لكن التنفيذ بيبقى ف المنام هستئذنكوا بقى اروح اكمل نومى يمكن اعرف استقر هناك ف الدنيا الجديدة اصل خلاص القديمة بقت زى قلتها !!!!!